Azərbaycan Dövlət Pedaqoji Universitetinin (ADPU) Şamaxı filialında Ümummilli lider Heydər Əliyevin anadan olmasının 99-cu il dönümünə həsr olunmuş Tələbə Elmi Cəmiyyətinin X elmi konfransı keçirilib. Konfransda filialın Sosial və pedaqoji elmlər, Riyaziyyat və kompüter elmləri və Dil-ədəbiyyat və onların tədrisi texnologiyası kafedralarının tələbələrinin elmi tədqiqat işləri təqdim olunub.
Konfrans öncəsi filialın direktoru dos.Tünzalə Yusifova, Elmi işləri üzrə direktor müavini f.ü.f.d.Şasəddin Mikayılov, Sosial və humanitar məsələlər üzrə direktor müavini Şəlalə Seyidova, Tələbə Elmi Cəmiyyətinin sədri p.ü.f.d. İlhamə Sultanova, professor-müəllim və tələbə heyətinin iştirakı ilə plenar iclas keçirilib. İclası giriş sözü ilə açan filialın direktoru, dosentTünzalə Yusifova tələbələrə uğurlar arzulayıb və qeyd edib ki, tələbələrin elmi yaradıcılığının inkişaf etdirilməsinə həmişə əhəmiyyət verilir və onlar hər zaman aktual mövzular üzrə tədqiqat işləri aparırlar. Daha sonra Tələbə Elmi Cəmiyyətinin sədri p.ü.f.d. İlhamə Sultanova TEC-in fəaliyyəti haqqında hesabat xarakterli çıxış edib.
Plenar iclasdan sonra konfrans işini üç bölmədə davam etdirib. Elmi rəhbərlərin iştirakı ilə tələbələrin tədqiqat işləri təqdim olunub və geniş müzakirə edilib. Təqdim olunan işlərin əksəriyyəti aktuallığı və spesifikliyi ilə seçilirdi. Konfransın yekununda bölmələr üzrə hesabat iclasları keçirilib və ən maraqlı tezislər seçilib.