ADPU-nun Şamaxı filialının Heydər Əliyev Lektoriyasında Tələbə Gənclər Təşkilatı nəzdində fəaliyyət göstərən Vətənpərvərlik Departamentinin təşkilatçılığı ilə “ON1000” proqramı çərçivəsində “Qəhrəmanlar unudulmur !” layihəsinin VII tədbiri keçirildi. Tədbirə başlamadan öncə torpaqlarımız uğrunda canından keçən şəhidlərimizin xatirəsi bir dəqiqəlik sükutla yad edildi. Tədbirə açılış nitqi ilə başlayan filialın direktoru dosent Tünzalə Yusifova bildirib ki, “Qəhrəmanlar unudulmur !” adlı layihə gənclərə vətənpərvərlik hislərinin aşılanması və Vətənimizin bütövlüyü uğrunda şəhid olmuş qəhrəman oğullarımızın daha geniş tanıdılması baxımından çox əhəmiyyətlidir. Layihə çərçivəsində şəhidlərin yad edilməsi, onlar haqqında məlumatların toplanması təqdirəlayiqdir. O, layihə barədə fikirlərini bölüşərək, orada şəhid ailələrinin xatirələrinin qələmə alınmasını da xüsusi qiymətləndirib. Tədbirdə məhz şəhid ailələrinin öz dilindən səslənən fikirlərin, xatirələrin lentə alınaraq, gənclərə çatdırılmasının mühüm iş olduğunu diqqətə çatdırıb. Vurğulayıb ki, Azərbaycan həqiqətlərinin dünyaya tanıdılması, ermənilərin işğalçılıq siyasəti, eləcə də bu işğalçılığa qarşı çıxaraq öz ölkəsinin ərazi bütövlüyü uğrunda şəhid olmuş oğullarımız barədə bu kimi layihələrin keçirilməsi və digər bir sıra təbliğat işlərinin aparılması olduqca vacibdir.

Sonra filialın Kitabxana və elektron resurslar şöbəsinin müdiri Vəsilə Razimi Şəhid əsgər Vüqar Manafovun həyat hekayəsindən bəhs edib. Digər çıxışcılar, Tələbə Gənclər Təşkilatının fəal üzvləri Azərbaycan dili və ədəbiyyat müəllimliyi ixtisasının II tədris ili tələbəsi Xədicə Kərimli Şəhid Əsgər Mehrac Əhədov, Azərbaycan dili və ədəbiyyat müəllimliyi ixtisasının IV tədris ili tələbəsi Çələbiyev Əlmustafa Şəhid Mayor Əliyar Əliyev, Tarix və coğrafiya müəllimliyi ixtisasının III tədris ili tələbəsi Nicat Quliyev Şəhid Mayor Asif Azayev, Təhsildə sosial psixoloji-xidmət ixtisasının I tədris ili tələbəsi Sevinc Xəlilova Şəhid Palkovnik Şükür Həmidov, Azərbaycan dili və ədəbiyyat müəllimliyi ixtisasının IV tədris ili tələbəsi Səfər Səfərov Şəhid Çavuş Ümüd Xəncəlov, Şəhid Əsgər Samir Kaçayev, Şəhid Əsgər Etibar Şirinov haqqında çıxış ediblər.

Tədbirdə iştirak edən Tədris şöbəsinin müdiri Fəxrəddin Məmmədov və Riyaziyyat və kompüter elmləri kafedrasının baş müəllimi Çingiz Dadaşov tələbə heyətinin bu kimi layihələrinə davamlılıq arzu ediblər.