Fizika müəllimliyi ixtisasının buraxılış ili tələbələri üçün MİQ imtahanlarına hazırlıq məqsədilə Kurikulum üzrə təlim təşkil olunmuşdur.

Təlim Pedaqogika və Psixologiya kafedrasının dəyərli müəllimi Abdullayeva Səməngül Tacəddin qızı tərəfindən aparılmışdır. Təlimin əsas məqsədi tələbələrin kurikulum anlayışını dərindən mənimsəməsinə kömək etmək, tədris prosesində müasir pedaqoji yanaşmaları tətbiq etmək bacarıqlarını inkişaf etdirmək və onların gələcək müəllimlik fəaliyyətinə daha hazırlıqlı şəkildə yönəldilməsini təmin etmək olmuşdur.

Təlim çərçivəsində kurikulumun nəzəri əsasları, tədris planlaması prinsipləri, dərs strukturu və qiymətləndirmə meyarları ardıcıl və sistemli şəkildə izah edilmişdir. Tələbələrə nəzəri biliklərin praktik tətbiqi üçün müxtəlif nümunələr təqdim olunmuş, real dərs planları və ssenarilər üzərində iş aparılmışdır. Bu yanaşma onların həm nəzəri biliklərini möhkəmləndirməyə, həm də pedaqoji bacarıqlarını artırmağa imkan yaratmışdır.

Həmçinin təlim zamanı interaktiv müzakirələr təşkil edilmiş, tələbələrin sualları ətraflı cavablandırılmış və onların müstəqil düşünmə, analitik yanaşma və fərdi yanaşma qabiliyyətlərinin inkişafına xüsusi diqqət yetirilmişdir. Tələbələr həmçinin MİQ imtahanının strukturu və qiymətləndirmə meyarları barədə məlumat almış, sınaq tapşırıqları və praktiki məşğələlər vasitəsilə imtahana hazırlıq prosesi üzrə təcrübə qazanmışlar.

Təlimin yekunu olaraq tələbələr həm nəzəri, həm də praktik sahədə biliklərini sınaqdan keçirmiş, kurikulum üzrə dərs planlaması və qiymətləndirmə bacarıqlarını inkişaf etdirmişdir. Bu təlim, tələbələrin gələcək pedaqoji fəaliyyətlərinə hazırlıq səviyyəsini artırmaqla yanaşı, onların müasir pedaqoji texnologiyalar və yanaşmalar barədə məlumatlılığını da artırmışdır.