İbtidai sinif müəllimliyi ixtisası üzrə təhsil alan buraxılış kursu tələbələri üçün xüsusi təşkil olunmuş növbəti təlim sessiyası baş tutdu. Təlim Riyaziyyat və kompüter elmləri kafedrasının  müəllimi Nərmanov Rasim  tərəfindən yüksək peşəkarlıqla aparılmışdır.

Təlimin əsas məqsədi tələbələri müəllimlərin işə qəbulu (MİQ) imtahanına daha effektiv şəkildə hazırlamaq, onların Riyaziyyat fənni üzrə nəzəri biliklərini möhkəmləndirmək və praktiki bacarıqlarını inkişaf etdirmək olmuşdur. Təlim zamanı iştirakçılara Riyaziyyat fənni üzrə MİQ imtahan proqramı haqqında geniş və əhatəli məlumat təqdim olundu. Proqramın strukturu, mövzular üzrə bölgü, hər bir mövzunun imtahandakı payı və qiymətləndirmə meyarları ətraflı şəkildə izah edildi.

Eyni zamanda, imtahan zamanı qarşıya çıxan sual tipləri, onların həlli strategiyaları və düzgün yanaşma üsulları nümunələr əsasında izah olunaraq tələbələrin diqqətinə çatdırıldı. Vaxtın səmərəli idarə olunması, test tapşırıqlarının düzgün təhlili və çətin sualların həlli yolları ilə bağlı da mühüm tövsiyələr verildi.

Təlimin növbəti mərhələsində praktiki hissəyə keçid edildi. Tələbələr nümunəvi sınaq testləri üzərində işləyərək nəzəri biliklərini tətbiq etmək imkanı qazandılar. Tapşırıqların müzakirəsi zamanı daha çətin və düşündürücü suallar üzərində xüsusi dayanılaraq onların həlli addım-addım izah edildi və müxtəlif yanaşma üsulları təqdim olundu.

Təlim interaktiv mühitdə təşkil olunmuş, iştirakçıların fəallığı yüksək səviyyədə təmin edilmişdir. Tələbələr aktiv şəkildə suallar verərək onları maraqlandıran məqamlarla bağlı ətraflı izahlar almış, mövzu üzrə yaranan çətinliklər operativ şəkildə aradan qaldırılmışdır. Bu interaktiv yanaşma iştirakçıların həm biliklərini möhkəmləndirməsinə, həm də real imtahan mühitinə daha yaxşı adaptasiya olunmasına şərait yaratmışdır.

Sonda qeyd olunmuşdur ki, bu cür sistemli və praktik yönümlü təlimlər tələbələrin MİQ imtahanına hazırlıq prosesində mühüm rol oynayır və onların uğur şansını əhəmiyyətli dərəcədə artırır.

MİQ imtahanına doğru inamlı addımlarla irəliləyən bütün tələbələrimizə uğurlar arzulayırıq