Azərbaycan Dövlət Pedaqoji Universitetinin (ADPU) Şamaxı filialında 31 mart   Azərbaycanlıların Soyqırımı Gününə həsr olunmuş  “31 mart – tarixi yaddaşımızdan silinməyən soyqırımı” adlı elmi- praktik konfrans keçirilib.
İlk olaraq Azərbaycanın azadlığı uğrunda və soyqırımı nəticəsində həlak olan  şəhidlərimizin əziz xatirəsi bir dəqiqəlik sükutla yad edilib. Ardınca 31 Mart soyqırımına həsr olunmuş videoçarx nümayiş olunub.
Tədbiri giriş sözü ilə filialın tədris və elmi işlər üzrə direktor müavini Şasəddin Mikayılov açaraq xalqımıza qarşı törədilən bu dəhşətli soyqırımı hadisəsinin tarixindən  bəhs edib.
Daha sonra Sosial və pedaqoji elmlər kafedrasının müdiri, dos. Mayıl Alıcanov  “Erməni soyqırımı bəşəri cinayətdir” mövzusunda geniş məruzə ilə çıxış edib. O qeyd edib ki, 1918-ci il 30 mart və 3 aprel tarixləri arasında Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə Bakı Soveti və daşnak erməni silahlı dəstələri azərbaycanlılara qarşı soyqırımı törədiblər. Rəsmi mənbələrə əsasən, soyqırımı nəticəsində 12 minə yaxın azərbaycanlı qətlə yetirilib, on minlərlə insan itkin düşüb. Ardınca Sosial və pedaqoji elmlər kafedrasının müəllimi Səməngül Abdullayeva “1918-ci ilin Şamaxıda törədilən  soyqırım haqqında” , Tarix və coğrafiya müəllimliyi ixtisasının I tədris ili tələbəsi  Fidan Qafarova  “Erməni diasporunun formalaşmasında erməni kilsəsinin rolu” mövzularında çıxış edib.
Son olaraq Təhsildə sosial-psixoloji xidmət ixtisasının I tədris ili tələbəsi  Səbinə Salmanlının  Dursun Musayevanın   “Şəhidlər” şeirini və İbtidai sinif  müəllimliyi ixtisasının I tədris ili tələbəsi  Nurcan İbadovanın “Bəxtiyar Vahabzadənin “Şəhidlər” şeirini səsləndirməsi ilə konfrans başa çatıb.
Onu da qeyd edək ki, 31 Mart Azərbaycanlıların Soyqırımı Günü ilə bağlı  tədbirlər planı çərçivəsində filialda soyqırımı qurbanlarının əziz xatirəsinə həsr olunmuş guşə yaradılıb.
Allah şəhidlərimizə rəhmət eləsin!